மாண்புமிகு பத்தினியாய்....

அற்றிருத்தல் நலம்
பற்றறுத்தலை விடவும்
மோப்பக் குழையும் அனிச்சமென
மௌனித்திருக்கையில்
பிய்த்தெறிந்துவிடுகிறாய்
அறிந்தோ அறியாமலோ
மாதவிடாய்க் கதைகள் பேசி
மகிழ்ந்திருக்க முடிவதில்லை பெண்ணாக...
பாண்டி வட்டத்திற்குள் சுருங்கிக்கொண்டு
புளியங்கொட்டைகளுடன்
புன்னகைக்கச் சொல்கிறாய்
முகப்புத்தகத்தில் உலகிருக்கும் யுகத்தில்...
அரசியல் கல் களைய
ஆர்வமிருக்கையில்
அரிசியில் கல் களைக்கிறேன்
மீண்டும் மீண்டும்
புணர்தலில் கூட
புரிந்துகொள்கிறேன் உன்னை
உணர்தலில் கூட
தொடர்வதேயில்லை என் நெஞ்சிருப்புக்களை
நீ

முரண்பாட்டு மேசைகளில்

உணவருந்திக்கொண்டிருக்கிறோம்
எண்ணக் கிளிஞ்ச்சல்கள்

தேங்கிக் கிடக்கின்றன தட்டுக்களில்

அற்றிருத்தல் நலம்தான் போலும்
பற்றறுத்தலை   விடவும்